Nesta sección trataremos os temas de máis actualidade que vaian acontecendo na Rúa ao longo do tempo. Para dar a túa opinión non tes máis que enviarnos un correo electrónico e poñerémonos en contacto contigo.
Estes son hoxe os nosos temas de maior interese:

O concello perde o xuizo das escolas deportivas
A Rúa (12-12-01) - O xulgado do social de Ourense ven de fallar unha resolución a favor de Berto Fernández Docampo como antigo monitor das escolas deportivas ao que o xuiz considerou vinculado laboralmente ao concello. Tras esta sentencia o equipo de Goberno municipal tense que plantexar tres opcións: recurrir a sentencia, readmitir ao traballador ou pagarlle a indemnización de máis de 700.000 pesetas (4.207,08 euros) establecida polo xuiz.
Esta mesma tarde ás 20:00 horas está prevista unha reunión da comisión informativa de Cultura e Deportes na que se decidirá de forma urxente a medida a tomar, aínda que todo parece indicar que a corporación se decantará pola indemnización ao ex monitor.
Dimisión do concelleiro de deportes
Pola súa banda o grupo do Partido Popular, en boca do seu portavoz Antonio Bello, pedíu a dimisión do edil nacionalista de Deportes, Fernando Rodríguez, por considerar que neste tema non defendeu os intereses veciñais. Bello dixo textualmente, en referencia ao BNG, que é "un partido que se caracteriza por la defensa de los trabajadores y en contra de las privatizaciones" e que, en contra do que é habitual, non estivo á altura neste tema.
Desaparición das subvencións a deportes
O alcalde da Rúa, José Vicente Solarat López, asegurou pola súa banda que "a decisión do xulgado se carga a política de subvencións aos clubes e entidades da Rúa", discrepando ao tempo da sentencia que foi contraria ao concello. Reiterou tamén que, persoalmente, se decanta pola opción de pagar a indemnización a Berto Fernández e que agardaba á reunión de hoxe para tomar unha decisión definitiva tras falar co resto do grupo de goberno.

Cambios nos sistemas de contratación
A Rúa (12-12-01) - Os representantes municipais tiveron onte unha reunión con representantes da Confederación Intersindical Galega (CIG) para regularizar diferentes aspectos do convenio de persoal laboral, principalmente en materia de contratacións. As medidas evitarán, segundo o alcalde Vicente Solarat, situacións como as vividas cos ex monitores das escolas deportivas, dous dos cales presentaron unha denuncia ante o xulgado do social de Ourense. O edil rues agarda poder rubricar en breve a revisión do convenio coa pretensión de que poida aplicarse desde principios de 2002.
Entre os retoques que se levarán adiante está a clarificación de contratos a tempo parcial para tareas específicas así como o tema de despidos. A regularización afectará aos días de asuntos propios, "para collelos con rigor e que se poidan denegar por necesidades de servizo, non máis de dous días ao mes", explicó Solarat López.

Declárase un incendio en Roblido
A Rúa (12-12-01) - Os veciños de Roblido levaron un susto na madrugada do domingo ao luns cando un incendio reduciu a cinzas unha palleira e dúas vivendas da poboación. A alarma que evitou danos persoais deuna un veciño que, sobre ás 7:00 de mañá notou o fume que saía dunha palleira.
Aínda que polo momento se descoñecen as causas do sinistro, todo parece indicar que o lume comezou nunha palleira na que se estaban a secar bullotes, onde o lume tería prendido sen querer na madeira. O incendio provocou que moitos dos veciños, a maioría de avanzada idade, tiveran que saír das súas casas co posto.
Os bombeiros comarcais acompañados da Guarda Civil foron os encargados de levar a cabo as labouras de extinción, que se prolongaron até as 12:00 do mediodía e que os propios bombeiros retomaron pola tarde para evitar que o lume se avivara por calqueira motivo.

Música e deporte no último pleno do ano
A Rúa (04-12-01) - O pleno celebrado onte no concello tróuxonos outra vez os que xa se están a converter en temas habituais dos últimos tempos. Dunha banda, as escolas deportivas municipais. O Partido Popular presentou unha moción sobre o seu funcionamento que non se chegou a votar; reiteraron que non consideraban claro o proceso de contratación e pediu detalles sobre a cuantía de disgregación das escolas (xa que este ano distintos especialistas se fixeron cargo por separado das distintas especialidades). O edil de deportes, o nacionalista Fernando Rodríguez recordou que se ofrecera a continuidade aos anteriores xestores se se atiñan aos criterios do concurso, e que somentes dous deles declinaron continuar.
Por outra banda, a situación da escola de música municipal deu lugar a outro intenso debate entre goberno e oposición. O PP presentou pola vía de urxencia unha proposta para que esta continuara funcionando, considerando que se trata dun servizo público. Pola súa banda, o alcalde independente, José Vicente Solarat, insistiu en que se lle outorgará unha subvención de 500.000 pesetas e se lle cederán as instalacións a unha profesora para que organice as clases. Ademáis, recordou que o anterior grupo de goberno do PP disolvera o conservatorio tras 16 anos de funcionamento.

Xuizo ao concello
A Rúa (28-11-01) - A denuncia presentada contra o concello polo que foi monitor dunha das escolas deportivas durante varios anos tivo onte a súa primeira sesión nos xuzgados de Ourense. Até a cidade das Burgas acudiron o propio denunciante, Berto Fernández Docampo, o alcalde José Vicente Solarat, e o concelleiro de deportes, Fernando Rodríguez, concellal do BNG.
Berto Fernández presentou varias denuncias polo que considera unha vulneración dos seus dereitos como traballador. O concello, pola súa banda, recorda que este ano se sacou un concurso para a presentación de proxectos e que houbo outros mellores que o presentado pola irmá do demandante. Ademáis lembran tamén que en realidade Berto nunca traballou como traballador con nómica do concello, senón como un colaborador autónomo, polo que nunca recibiu unha nómina da da corporación municipal.
As escolas deportivas da Rúa teñen unha duración habitual de outubro a maio. Os problemas xurdidos nesta edición fixeron que o comezo se retrasara case dous meses. O concello recibiu tres propostas para este ano das que escolleu a do único titulado en INEF que se presentou ao concurso, Eduardo R.

Renovación no Partido Popular
A Rúa (22-11-01)- Tas dos últimos sucesos acontecidos no seo da formación local e o falecemento do anterior líder local do partido e alcalde da vila, José Míguez Freire, o Partido Popular inicia agora unha etapa de renovación. O edil Manuel Rey Rionegro foi designado polo seu partido para presidir unha xunta provisional que será a encargada de organizar o proceso de renovación da executiva local do PP. A data límite será o 31 de xaneiro. Até o de agora unha xunta xestora presidida por Emiliano Quiroga foi a encargada de dirixir o partido. Tras catro anos de traballo a xestora foi sustituida agora por esta xunta provisional, integrada polos seis concellais en activo no concello.
Nin Emiliano Quiroga nin Magadán estarán presentes na nova xestora, segundo anunciou o presidente provincial do Partido Popular, José Luis Baltar, na súa recente visita á vila.

Novo disco de Abertal
A Rúa (11-11-01) - A agrupación de música e baile tradicionais Abertal, fundada e dirixida por Manuel Anxo Durán Blanco, ven de sacar á venda o seu primeiro disco. 12 temas nos que se inclúen foliadas, muiñeiras, plas ou pasodobles e na que participan, ademáis dos alumnos da agrupación, o fundador Manoel Durán e os demáis profesores de Abertal: Pepón Nieto e Xaquín Xesteira.
Todos os interesados en adquirir o CD poden facelo poñéndose en contacto co propio Manoel Durán oun con esta mesma páxina web, a través do noso
(Pulsa na imaxe para escoitar as cancións deste disco)